حصہ دوم انور سدید
ڈاکٹر انور سدید 4 دسمبر 1928 ء کو سرگودھا میں پیدا ہوئے۔ 20 مارچ 2016 ء کو وفات پائی۔ ان کا پیدائشی نام محمد انوار الدین تھا۔ ان کے والد کا تعلق محنت کش راجپوت قبائل سے تھا۔ ڈاکٹر انور سدید نے ابتدائی تعلیم سرگودھا میں مکمل کی۔ انہوں نے پنجاب یونیورسٹی سے ادیب فاضل کیا۔ 1966 ء میں انسٹی ٹیوٹ آف انجنئرز ڈھاکا سے سول انجنئرنگ کی ڈگری حاصل کی۔ اس کے کچھ سال بعد ڈاکٹر وزیر آغا کے ایما پر ایم اے اردو کیا اور ‘اردو ادب کی تحریکیں’ کے عنوان سے مقالہ لکھ کر پی ایچ ڈی کی۔
ڈاکٹر انور سدید 1948 ء سے 1966 ء تک سرگودھا سے شائع ہونے والے اردو ماہنامہ “اردو زبان” کے مدیر رہے۔ 1988 ء سے 1992 ء تک وزیر آغا کے “اوراق” سے منسلک رہے۔ اس کے علاوہ 1990 ء سے 1995 ء تک “قومی آواز” کے مدیرِ اعلیٰ تھے۔ 1995 ء میں روزنامہ”خبریں” لاہور کے مدیر بنے۔ اس کے بعد کچھ سال روزنامہ” نوائے وقت” کے ادارتی عملے کی قیادت کی۔ “نوائے وقت” میں گفتنی کے عنوان سے کالم لکھتے رہے۔
ڈاکٹر انور سدید نے محقق، ناقد، مترجم، مبصر، مورخ، صحافی ، مدیر، شاعر، افسانہ نگار، خاکہ نگار، انشائیہ نگار اور کالم نویس کی حیثیت سے اپنی شناخت قائم کی۔انہوں نے 80 سے زائد کتابیں تصنیف کیں۔ سجاد نقوی ایک جگہ انور سدید کا تعارف کراتے ہوئے لکھتے ہیں:
” ڈاکٹر انور سدید کے فن کی اساس ان کا مطالعہ ہے۔ جس کے لئے انہوں
نے زندگی کا بیشتر حصہ صرف کیا اور ان کے تخلیقی اور تنقیدی کام کو غیرمعمولی
قرار دیا گیا۔ انور سدید کی ایک اور خوبی ان کا رومانوی اندازِ نگارش (اسلوب )
ہے جو ہر صنفِ ادب کے مزاج سے ہم آہنگ ہونے کے ساتھ ساتھ تخلیقیت
جوہر سے مملو ہے۔ ان کی ادبی جہات کثیر ہیں اور اتنی جہات اردو کے بہت
کم ادیبوں میں مجتمع نظر آتی ہیں۔” (5)
ڈاکٹر انور سدید کا ایک کارنامہ ” اردو ادب کی مختصر تاریخ” ہے۔ اس کتاب میں ابتدا سے لے کے 1980 ء تک اردو ادب سے متعلق تقریباً تمام اصناف کا احاطہ کیا گیا ہے۔ انو سدید خود اس کتاب کے حوالے سے کہتے ہیں:
” یہ کتاب جسے میں نے “اردو ادب کی مختصر تاریخ” کہنے کی جسارت کی ہے
میرے ایک پرانے خواب کی تعبیر ہے۔ یہ خواب میں نے ” اردو ادب کی
تحریکیں” لکھنے کے بعد دیکھا تھا۔ اس کے عناصرِ ترکیبی میں ایک یہ بات بھی
تھی کہ ” اردو ادب کی تحریکیں” میں متعدد ایسے ادیبوں کے کارنامے زیرِ بحث
نہیں آ سکے تھے جو تاریخ میں تو نمایاں مقام حاصل کر چکے ہیں لیکن جنھیں
کسی مخصوص تحریک کے مدار میں شامل کرنا ممکن نہیں تھا۔ یہ کتاب چھپ کر
آئی تو مجھے اپنے موقف کی صراحت متعدد مرتبہ کرنی پڑی۔ با الفاظِ دیگر “اردو
ادب کی تحریکیں” نے ہی ” اردو ادب کی مختصر تاریخ” کو کروٹ دی ہے۔ (6)
ڈاکٹر انور سدید کی اہم کتابوں کے نام درجِ ذیل ہیں:
اردو ادب میں سفر نامہ، بہترین نظمیں، غالب کے نئے خطوط، ڈاکٹر وزیر آغا، اردو ادب کی تحریکیں، میر انیس کی اقلیم سخن، مولانا صلاح الدین احمد، اقبال شناسی اور ادبی دنیا، اردو افسانہ کی کروٹیں، اردو ادب کی مختصر تاریخ، اردو افسانے میں دیہات کی پیش کش۔
فرمان فتح پوری
ڈاکٹر فرمان فتح پوری 26 جنوری 1926 ء کو بھارت کی ریاست اتر پردیش میں فتح پور میں پیدا ہوئے۔ ڈاکٹر فرمان فتح پوری کا اصل نام سید دلدار علی تھا۔ انہوں نے فتح پور سے میٹرک کیااس کے بعد انہوں نے 1948 ء میں الہ آباد سے انٹر کیا۔ 1950 ء میں آگرہ یونیورسٹی سے گریجویشن کی۔ اسی سال وہ ہجرت کر کے کراچی، پاکستان آ گئے۔ انہوں نے کراچی یونیورسٹی سےایم اے، ایل ایل بی اور بی ٹی کیا اور پھر 1965 ء میں پی ایچ ڈی کی ڈگری حاصل کی۔
ڈاکٹر فرمان فتح پوری کراچی یونیورسٹی کے شعبہ اردو سے وابستہ رہے اور صدر شعبہ اردو ریٹائر ہوئے۔ 1985 ء میں اردو ڈکشنری بورڈ کے مدیرِ اعلیٰ اور سیکریٹری مقرر ہوئے۔ ان کی خدمات کی وجہ سے اسی سال حکومت نے انہیں ستارہ امتیاز سے نوازا۔ 1996 ء میں سندھ حکومت کے سول سروس بورڈ کے رکن بنے۔ ادبی جریدے “نگار” کے مدیر بھی رہے۔ ڈاکٹر فرمان فتح پوری 60 سے زائد کتابوں کے مصنف تھے۔ اہم کتابوں کے نام مندرجہ ذیل ہیں۔
تحقیق، تنقید، نیا اور پرانا ادب، تدریس اردو، زبان اور اردو زبان، اقبال سب کے لئے، اردو شعرا کے تذکرے اور تذکرہ نگاری، غالب شاعرِ امروز و فردا، ہندی اردو تنازع، اردو رباعی، نیاز فتح پوری دیدہ شنیدہ، عورت اور فنونِ لطیفہ۔
ڈاکٹر فرمان فتح پوری نےاردو نثر کے حوالے سے تحقیق و تنقید کی بہترین کتابیں تصنیف کی۔ ابتدائی دور میں جب انہوں نے یہ سلسلہ شرع کیا اس وقت شاعری پر تنقید کا رجحان زیادہ تھا۔ ڈاکٹر فرمان فتح پوری نے نثر کی اہمیت کو اجاگر گیا۔ ایک جگہ وہ لکھتے ہیں:
” بایں ہمہ اردو نثر کو ہمارے ادیبوں اور ناقدوں نے کچھ زیادہ در خورِ اعتنا
نہیں جانا، ان کے مطالعے، ان کے قلم اور ان کی دلچسپیوں کا رخ عموماً
شعر و شاعری کی طرف رہا ہے۔ نتیجتاً اردو نثر کے تاریخی و فنی ارتقا پر دو
چار کتابیں بھی ڈھنگ کی نظر نہیں آتیں۔ چناں چہ اگر کوئی چاہے کہ اسے
اردو نثر کے صنفی یا اسلوبی ترقی پر کوئی حقیقت پسندانہ جائزہ یا قابلِ استناد
مواد ، یکجا ہاتھ آ جائے تو مایوسی ہو گی۔” (7)
ڈاکٹر فرمان فتح پوری کا انتقال 3 اگست 2013 ءکو کراچی میں ہوا۔
جمیل جالبی
ڈاکٹر جمیل جالبی 12 جون، 1929 ء کو علی گڑھ (ہندوستان) میں پیدا ہوئے۔ ان کا اصل نام محمد جمیل خان ہے۔ ان کے آبا و اجداد یوسف زئی پٹھان ہیں اور اٹھارویں صدی میں سوات سے ہجرت کر کے ہندوستان میں آباد ہوئے تھے۔ ابتدائی تعلیم علی گڑھ سے حاصل کی۔ میرٹھ کالج سے 1945 ء میں انٹر اور 1947 ء میں بی اے کی ڈگری حاصل کی۔ تقسیم ہند کے بعد ڈاکٹر جمیل جالبی پاکستان آ گئے اور کراچی میں مستقل سکونت اختیار کر لی۔ جمیل جالبی بہادر یار جنگ ہائی سکول میں بطور ہیڈ ماسٹر خدمات سرانجام دینے لگے۔
دورانِ ملازمت ہی ایم اے اور ایل ایل بی کے امتحانات پاس کر لئے۔ اس کے بعد 1972 ء میں سندھ یونیورسٹی سے ڈاکٹر غلام مصطفیٰ خان کی نگرانی میں قدیم اردو ادب پر مقالہ لکھ کر پی ایچ ڈی اور 1978 ء میں مثنوی کدم راؤ پدم راؤ پر ڈی لٹ کی ڈگریاں حاصل کیں۔ بعد ازاں سی ایس ایس کے امتحان میں شریک ہوئے اور کامیاب ہوئے۔ ملازمت سے ریٹائرمنٹ کے بعد باقاعدہ طور پر ادبی سرگرمیوں میں مصروف ہوئے۔ قبل ازیں انہوں ماہنامہ “ساقی” میں معاون مدیر کے طور پر خدمات سر انجام دیں۔ اس کے علاوہ انہوں نے اپنا ایک سہ ماہی رسالہ ” نیا دور” بھی جاری کیا۔
ڈاکٹر جمیل جالبی 1983 ء میں کراچی یونیورسٹی کے وائس چانسلر اور 1987 ء میں مقتدرہ قومی زبان ( ادارہ فروغِ قومی زبان) کے چئیر مین تعنیات ہوئے۔ اس کے علاوہ آپ 1990 ء سے 1997ء تک اردو لغت بورڈ کے سربراہ بھی مقرر ہوئے۔ آپ کا سب سے اہم کام قومی انگریزی اردو لغت کی تدوین اور تاریخِ ادبِ اردو، ارسطو سے ایلیٹ تک، پاکستانی کلچر: قومی کلچر کی تشکیل کا مسئلہ جیسی اہم کتابوں کی تصنیف و تالیف ہے۔ ان کی دیگر تصانیف اور تالیفات میں تنقید و تجربہ، نئی تنقید، ادب ، کلچر
اور مسائل، معاصرِ ادب، قومی زبان یک جہتی نفاذ اور مسائل، محمد تقی میر، قدیم اردو کی لغت، فرہنگِ اصلاحات جامع عثمانیہ شامل ہیں۔
ڈاکٹر جمیل جالبی کو ان کی علمی و ادبی خدمات کے اعتراف میں بہت سے اعزازات سے نوازا گیا۔ حکومتِ پاکستان کی طرف سے 1990 ء میں ستارہ امتیاز اور 1994 ء میں ہلالِ امتیاز سے نوازا گیا۔ اکادمی ادبیاتِ پاکستان کی طرف سے 2015 ء میں آپ کو پاکستان کے سب سے بڑے ادبی انعام کمالِ فن ادب انعام سے نوازا گیا۔ ڈاکٹر جمیل جالبی نے تقریباً نوے سال عمر پائی۔ ان کا نتقال 18 اپریل، 2019 ء میں ہوا۔
ڈاکٹر جمیل جالبی نے تحقیق میں میدان میں بہت گراں قدر کام کیا ہے۔ ایسے ایسے موضوعات پر تحقیق کی اور ایسی معلومات فراہم کیں جو اس سے پیشتر منظرِ عام پر نہیں آئی تھیں۔ احمد ندیم قاسمی ان کی کتاب “ادبی تحقیق” کے دیباچے میں اس حوالے سے کہتے ہیں:
“جس طرح ڈاکٹر جمیل جالبی کی شخصیت متنوع ہے، اسی طرح “ادبی تحقیق” کے
مندرجات بھی متنوع ہیں اور بعض مضامین تو ایک طرح سے انکشافات ثابت ہوں
گےکہ ان میں بیشتر ایسی معلومات جمع ہیں جو ابھی تک منظرِ عام پر نہیں آئی تھیں۔
میں پورے اعتماد کے ساتھ کہہ سکتا ہوں کہ “ادبی تحقیق” (جو ادبی تنقید کا درجہ رکھتی ہے) معاصر اردو ادب میں ایک ایسی تصنیف ثابت ہو گی جس کے حوالے
کے بغیر مستقبل کا کوئی بھی ادبی مورخ یا محقق یا ناقد اپنے موضوع کے ساتھ کماحقہٗ
انصاف نہیں کر سکے گا۔” (8)
ڈاکٹر جمیل جالبی سمجھتے ہیں کہ کوئی اعلیٰ تحریر گہرے شعور کے بغیر وجود میں نہیں آ سکتی۔ چناں چہ وہ زندگی سے گہر ے تعلق ، علم و فکر اور زندگی کی تفہیم سے حاصل ہوتا ہے۔ ڈاکٹر قاضی عبدالقادر اس حوالے سے رقم طراز ہیں:
” ان کے مطابق یہی نہیں کہ آج کا ادیب مصلحتوں میں محصور اور غیر معقول
تنہائیوں کا اسیر ہو گیا ہے بلکہ اس کا اپنی تاریخ سے، ثقافت سے، ماضی سے بھی
رشتہ ٹوٹ گیا ہے۔ لیکن یہ رشتہ ” لفظ آگاہی” کے ذریعہ ہی دوبارہ استوار ہو گا
شعوری سطح پر اس کی بنیاد رکھنی ہو گی، معقولیت کے دائرے میں ادبی عمل جاری
رکھنا ہو گا۔” (9)
عطش درانی
ڈاکٹر عطش درانی 22 جنوری 1952 ء میں پیدا ہوئے اور 30 نومبر 2018 ء میں وفات پائی۔ ڈاکٹر عطش درانی نے سو سے زائد کتابیں لکھیں۔ ابتدا میں وہ شاعری بھی کرتے تھے اور احسان دانش سے اصلاح لیتے تھے پھر انہی کے کہنے پر شاعری چھوڑ کر نثر کی طرف توجہ دی۔ 1976 ء میں سید قاسم محمود کی سربراہی میں مکتبہ شاہکار میں اسلامی انسائیکلوپیڈیا اور متعدد کتابوں پر کام کیا۔ سیارہ ڈائجسٹ کی ادارت اڑھائی تین برس کی۔ مجلس زبان دفتری کے حوالے سے لاہور میں گورنمنٹ سروس اور اردو نامہ کی ادارت کی ۔ حکومتِ پنجاب کے رسالے” اردو نامہ ” کی ادارت سنبھالی اور ایک سرکاری جریدے کو علمی تحقیقی جریدے میں تبدیل کر دیا۔ حکومتِ پنجاب کی ملازمت سے پھر مقتدرہ قومی زبان میں چلے گئے اور وہاں طویل عرصہ گزار کرلسانیات کے حوالے سےخاطر خواہ کام کیا۔
مقتدرہ قومی زبان کے بعد علامہ اقبال اوپن یونیورسٹی میں شعبہ “پاکستانی زبانیں” کے سربراہ رہے۔ خادم علی ہاشمی اور منور ابنِ صادق کے ساتھ مل کر علم التعلیم، سائنس اور فنیات کی اصطلاحات سازی پر اصطلاحات مرتب کیں۔ جنہیں مقتدرہ قومی زبان(ادارہ فروغِ قومی زبان) نے “اصطلاحات فنیات” اور “تعلیمی اصطلاحات” کے عنوانات کے تحت شائع کیا۔
ڈاکٹر عطش درانی کی آخری تصنیف “کتاب الجواہر” جو البیرونی کی تصنیف “الجماہر فی معرفہ الجواہر” کے اس حصے کا ترجمہ ہے جو جواہرات سے متعلق ہے، نیشنل بک فاؤنڈیشن اسلام آباد نے جولائی 2018 ء میں شائع کی۔ حکومتِ پاکستان نے ان کی علمی و تحقیقی خدمات پر انہیں تمغہ امتیاز اور ستارہ امتیاز سے نوازا۔ ان کی چند اہم کتابوں کے نام درجِ ذیل ہیں۔
اسلامی فکر و ثقافت، مغربی ممالک میں ترجمے کے قومی اور عالمی مراکز، لسانی و ادبی تحقیق و تدوین کے اصول، کتابیاتِ قانون، پاکستانی اردو کے خدو خال، لغات و اصطلاحات میں مقتدرہ کی خدمات، اردو اصطلاحات نگاری، اصنافِ ادب کی مختصر تاریخ۔
ڈاکٹر عطش درانی اسلامی فکر ثقافت کے حوالے سے بھی تحقیق و جستجو کے قائل تھے۔ اپنی کتاب “اسلامی فکر و ثقافت” کے دیباچے میں لکھتے ہیں:
” دورِ جدید میں اس امر کی ضرورت ہے کہ اسلامی فکر کو پھر سے اس کی بنیاد
مہیا کی جائے اور دوسرے رخ یعنی فکر و تعقل کو بھی اسلامی ہونے کی سند عطا
کی جائے۔ شاید میری کتاب اسی سمت کا ایک سفر ہو۔ شاید یہ اسی جہت کی
کی طرف اشارہ کرے جس کی راہ دورِ جدید کے مفکرین خصوصاً اقبال نے
دکھائی ہے۔” (10)
