تحقیق و جستجو انسان کی فطرت میں شامل ہے۔ وہ اپنے علم و ہنر کو بروئے کار لا کر حقیقت تک پہنچنا چاہتا ہے۔ تحقیق سے انسان نہ صرف علم حاصل کرتا ہے بلکہ اپنے لیے آسانیاں بھی پیدا کرتا ہے۔ چناں چہ تحقیق کی اہمیت و ضرورت سے انکار نہیں کیا جا سکتا۔ بقول پروفیسر ڈاکٹر شاہد صدیقی:
“علم و فن کے شعبوں میں تو تحقیق روح کی حیثیت رکھتی ہے کیوں کہ اسی کے
ذریعہ کسی موضوع سے متعلقہ مواد کو مرتب کیا جاتا ہے ، اس کا تجزیہ کیا جاتا ہے اس پر تنقید کی جاتی ہے اور پھر اس سے حاصل ہونے والے نتائج سے دوسروں کو
آگاہ کیا جاتا ہے۔ ہر محقق کی دلی خواہش ہوتی ہے کہ اس کا تحقیقی عمل معیاری ہو
اور دوسروں کے لیے سود مند ثابت ہو۔”(1)
بیسویں صدی کے آغاز کے ساتھ ہی اردو میں خالص ادبی تحقیق کا آغاز ہوتا ہے۔ اس سلسلے میں مولوی عبدالحق، حافظ محمود شیرانی، قاضی عبدالودود، امتیاز علی عرشی اہم نام ہیں جنہوں نے اپنی زندگی کا بڑا حصہ اردو زبان کی ترویج و ترقی میں صرف کیا اور اردو میں تحقیق کا معیار بلند کیا۔ انور سدید کہتے ہیں:
” بیسویں صدی میں تحقیقی روایت میں توسیع کرنے والےایک اہم بزرگ مولوی
عبدالحق ہیں۔ مولوی عبدالحق کو یہ اہمیت حاصل ہے کہ انہوں نے تحقیقِ ادب کو
ایک قومی نصب العین کی طرح قبول کیا اور اسے عمر بھر جاری رکھا۔ قدیم دکنی
مخطوطوں کی تلاش وصحت ان کے بنیادی کاموں سے ہیں۔ دکن کے غیر دریافت
ادب کو منظر عام پر لا کر انہوں نے معلوم ادبی تاریخ کی کایا پلٹ دی۔”(2)
آزادی سے پہلے اردو کی اس تحقیقی روایت کو درج بالا بزرگوں کے علاوہ بعض دیگر علمائے ادب و تحقیق نے بھی تقویت پہنچائی اور اپنے تحقیقی کارناموں سے اس روایت کو مستحکم کیا۔ محی الدین قادری زور، مولوی محمد شفیع، برج موہن دتاتریہ کیفی، شیخ چاند حسن، حامد حسن قادری، مولانا امتیاز علی عرشی، شیخ محمد اکرام، نصیر الدین ہاشمی، مالک رام اور مسعود حسین خان رضوی وغیرہ چند ایسے ہی نام ہیں جنہوں نے اپنے اپنے دائرہ کار میں زبان و ادب کے بے شمار مخفی گوشوں کو بے نقاب کیا اور اردو تحقیق کی ترقی میں اپنا کردار ادا کیا۔
عصرِ حاضر کے محققین
تقسیمِ ہند کے بعد عصرِ حاضر میں اردو تحقیق کی روایت کو ثروت مند بنانے میں جن محققین نے اہم کردار ادا کیا ہے ان میں وحید قریشی، سلیم اختر، ڈاکٹر انور سدید، فرمان فتح پوری، جمیل جالبی، عطش درانی، مشفق خواجہ، شمس الرحمٰن فاروقی، تحسین فراقی، خواجہ محمد ذکریا، تبسم کاشمیری اور فتح محمد ملک اہم ترین نام ہیں۔
ڈاکٹر وحید قریشی
ڈاکٹر وحید قریشی 14 فروری 1925ء کو میانوالی (پاکستان) میں پیدا ہوئے۔ ان کا پیدائشی نام عبدالوحید تھا۔ انہوں نے ساہیوال، گوجرانوالہ اور لاہور کے مختلف تعلیمی اداروں میں تعلیم حاصل کی۔ فارسی اور تاریخ میں ایم اے کی ڈگریاں حاصل کیں۔ کلاسیکی فارسی نثر میں پی ایچ ڈی اور ‘میر حسن اور ان کی شاعر ی ‘کے عنوان سے مقالہ لکھ کر ڈی لٹ کی ڈگری حاصل کی۔ 1963ء میں پنجاب یونیورسٹی کے اورینٹل کالج لاہور میں لیکچرار مقرر ہوئے۔ 1983ء میں مقتدرہ قومی زبان( موجودہ ادارہ فروغِ
قومی زبان) سے وابستہ ہوئے۔ اس کے علاوہ اقبال اکادمی، بزمِ اقبال اور مغربی پاکستان اردو اکیڈمی سے بھی وابستہ رہے۔ ستمبر 2003 ء سے اکتوبر 2009 ء تک یعنی اپنی وفات تک گورنمنٹ کالج یونیورسٹی لاہور میں پروفیسر ایمریطس کے فرائض انجام دیتے رہے۔
ڈاکٹر وحید قریشی نے بہت سی یادگار تصانیف چھوڑی ہیں۔ اہم تصانیف کے نام درجِ ذیل ہیں۔
انشائی ادب، 1965 ء کے بہترین مقالے، پنجاب میں اردو(مرتب)، تعلیم کے بنیادی مباحث، اقبال اور نظریہ وطنیت، اساسیاتِ اقبال، نقدِ جاں (شاعری)، مطالعہ حالی، میر حسن اور ان کا زمانہ، کلاسیکی ادب کا تحقیقی مطالعہ، تنقیدی مطالعے، جدیدیت کی تلاش میں، افسانوی ادب، پاکستانی قومیت کی تشکیلِ نو، اردو ادب کا ارتقا: ایک جائزہ، مقدمہ شعر و شاعری(مرتب)، دیوانِ آتش: تجزیہ او رتنقید، دیوانِ جہاندار، نامہ عشق، مقالاتِ تحقیق۔
ڈاکٹر وحید قریشی نے بھرپور ادبی زندگی گزاری اور تحقیق کے میدان میں نہایت بیش قیمت کتب کا اضافہ کیا۔ ڈاکٹر وحید قریشی کی خدمات کے اعتراف کے طور پر حکومتِ پاکستان نے 14 اگست 1993ء انہیں صدارتی تمغہ برائے حسنِ کارکردگی کا عزاز عطا کیا تھا۔ ڈاکٹر وحید قریشی نے 17 اکتوبر 2009ء کو لاہور میں وفات پائی ۔ وہ لاہور کے سمن آباد کے قبرستان میں آسودہ خاک ہیں۔
سلیم اختر
ڈاکٹر سلیم اختر 11 مارچ، 1934ء کو لاہور میں پیدا ہوئے اور 30 دسمبر 2018 ء میں وفات پائی۔ ان کے والد قاضی عبدالحمید ملٹری اکاؤنٹس میں ملازم تھے۔ اس لئے جہاں جہاں ان کا تبادلہ ہوتا رہا ، بچوں کو بھی ہمراہ لے جاتے رہے۔ ڈاکٹر سلیم اختر نے میٹرک فیض الاسلام ہائی سکول راولپنڈی سے 1951 ء میں کیا۔ ایف اے اور بی اےگورنمنٹ کالج اصغر مال راولپنڈی سے اور ڈپلومہ آف
لائبریری سائنس، ایم اے (اردو)، پی ایچ ڈی پنجاب یونیورسٹی سے کی۔ آپ شعبہ تعلیم سے وابستہ تھے ۔ اس کے علاوہ مختلف ادبی رسائل کے ساتھ بھی منسلک رہے۔
ڈاکٹر سلیم اختر نے بطور اردو لیکچرار پہلی ملازمت گورنمنٹ ایمرسن کالج ملتان میں کی۔ وہاں آٹھ سال رہنے کے بعد گورنمنٹ کالج لاہور چلے آئے۔ 1994ء میں یہاں سے ریٹائرمنٹ کے بعد اگلے گیارہ سال یہاں وزیٹنگ پروفیسر کے طور پر پڑھاتے رہے۔ اس کے علاوہ یونیورسٹی آف ایجوکیشن میں بھی درس و تدریس کی ذمہ داریاں نبھاتے رہے۔
ڈاکٹر سلیم اختر ان نقادوں میں شامل ہیں جو بہترین تخلیق کار بھی تھے ۔ وہ افسانہ نگاری میں بھی ایک خاص مقام رکھتے ہیں۔ ان کے افسانوں میں ترقی پسندوں کی طرح صورتِ حال کو بدلنے کی خواہش دکھائی دیتی ہے۔ افسانوی مجموعوں اور ناولوں کے علاوہ تنقید، تحقیق اور دیگر کئی موضوعات پر ان کی متعدد کتابیں شائع ہو چکی ہیں۔ ان کی کتاب “اردو ادب کی مختصر ترین تاریخ” ان کا سب سے بڑا کارنامہ ہے۔ یہ اردو ادب کی تاریخ کا سب سے اہم حوالہ تصور کی جاتی ہے۔
ان کی دیگر کتابوں میں اک جہاں سب سے الگ(سفر نامہ)، نشانِ جگر سوختہ(آپ بیتی)، انشائیہ کی بنیاد، ادب اور کلچر، ادب اور لاشعور، فکرِ اقبال کا تعارف، اقبال اور ہمارے فکری رویے، کلامِ نرم و نازک، شادی، جنس اور جذبات، عورت جنس اور جذبات، عورت جنس کے آئینے میں، مرد جنس کے آئینے میں شامل ہیں۔ ڈاکٹر سلیم اختر کے بارے میں سید وقار عظیم کہتے ہیں:
” سلیم اختر کے مضامین پڑھ کر میں نے دو باتیں خصوصیت سے محسوس
کی ہیں۔ ایک یہ کہ اختر صاحب کے مزاج میں ایک خاص طرح کی جدت
پسندی ہے اور اس کا نتیجہ یہ ہے کہ مطالعہ کرتے وقت ان کی نظر ہمیشہ
کسی ایسے موضوع پر پڑتی ہے جس تک دوسروں کی نظر نہیں پہنچی۔ دوسری
بات جسے میں ان کے مزاج کی بڑی مستحسن خصوصیت سمجھتا ہوںوہ یہ
ہے کہ وہ نئی بات کو نئے انداز میں کہنے کی صلاحیت رکھتے ہیں۔”(3)
“تنقیدی دبستان” ڈاکٹر سلیم اختر کی ایک اہم کتاب ہے ۔ اس کتاب میں تنقید کی حدود ، امکانات ، اقسام، اسالیب اور تنقیدی دبستان کے حوالے سے تفصیلی جائزہ لیا گیا ہے۔ اس کتاب کے دیباچے میں پروفیسر حمید احمد خان انہیں خراجِ تحسین پیش کرتے ہوئے لکھتے ہیں:
“سلیم اختر ملک کے نقادوں میں ایک ممتاز حیثیت حاصل کر چکے ہیں ۔ ان کے
مقالات جو چند سال سے ہمارے ادبی رسائل کی زینت بنتے رہے ہیں ایک وسیع
حلقہ ناظرین میں معروف و مقبول ہیں۔ گزشتہ سال میں نے ان کی مختصر تاریخ
اردو ادب بہت دلچسپی سے دیکھی تھی اور مقامِ مسرت ہے کہ اب تنقید کے
متعدد اور مختلف مسالک پر ان کا یہ تبصرہ اہلِ علم کی ایک اور اہم ضرورت کو
پورا کرنے کے لیے شائع ہو رہا ہے۔” (4)جاری ہے
