اردو افسانہ نگاری میں علامت نگاری کا آغاز اور ارتقا

             افسانہ

           افسانہ  ادب کی ان اصناف میں سے ہے جو ہمارے ہاں مغرب سے آئیں۔ افسانے میں زندگی کے ایک پہلو کی عکاسی ملتی ہے۔       افسانہ اختصار کا متقاضی ہوتا ہے لیکن اس کے ساتھ ساتھ اس میں قصہ، پلاٹ، کردار نگاری، وحدتِ تاثر اور اسلوب کی چاشنی بھی از حد ضروری ہے۔    احساسات  اور جذبات کی مو ثر  منظر نگاری افسانے کی بنیاد ہے ۔  انسان کی زندگی کی رنگا رنگی کے باوجود افسانے کے لئے  نت نئے موضوع  تلاش کرنا مشکل بھی ہوتا ہے۔ اس حوالے سے ڈاکٹر فردوس انور قاضی لکھتی ہیں:

              ” انسان کا ذہن جو ہر لمحہ نئے پن کی تلاش میں سر گرداں رہتا ہے۔ وہ بہت جلد ہر چیز

                                                        سے اکتا جاتا ہے۔ فرسودگی کا یہ احساس ہی  افسانے میں موضوع کی تلاش کا مرحلہ

                                                              مشکل بنا دیتا ہے۔ ایسے وقت تخیل اور مشاہدہ کام آتا ہے۔ معمولی سے معمولی بات

                                                     جو بظاہر عام اور معمولی ہو۔ عام سے کردار جن میں کوئی اہم چیز نظر نہ آتی ہو۔ ان

                  میں خصوصیت اور اہمیت کو محسوس کرانا اور اس کو اس انداز میں پیش کرنا کہ لوگ

                                                                                                    چونک اٹھیں اور حیران رہ جائیں۔ عام چیز خاص بن جائے۔ فرسودہ رنگ نئے رنگ

                                                             میں ڈھل جائے۔ یہی افسانے کا فن ہے۔” (1)

      اردو افسانے کا آغاز بیسویں صدی کے آغاز کے ساتھ ہی ہوا تھا۔ اولین افسانہ نگاروں میں علامہ راشدالخیری ، سجاد حیدر یلدرم، نیاز فتح پوری  اور خواجہ حسن نظامی کا بھی ذکر کیا جاتا ہے  لیکن حقیقت میں

 افسانے کی داغ بیل منشی پریم چند نے ڈالی۔   انہوں نے تسلسل سے افسانے لکھے ۔ افسانے کے فنی پہلوؤں کا خیال رکھتے ہوئے عمدہ افسانے تحریر کئے اور افسانے کے ارتقا میں اہم کردار ادا کیا۔

                                          افسانے کا  ابتدائی دور

                                                     اردو افسانے کی ابتدا جس دور میں ہوئی وہ سیاسی غلامی کا دور تھا۔ یہ معاشرتی پسماندگی کا زمانہ تھا۔ افسانے کی ابتدا کے حوالے سے ڈاکٹر انوار احمد کہتے ہیں:

               ” اردو افسانے نے سیاسی غلامی، معاشرتی پسماندگی اور ذہنی و جذباتی زلزلوں سے

                                     معمور دنیا میں آنکھ کھولی، یوں اپنے آغاز میں ہی یہ اپنے لب و لہجے ، طرزِ احساس

                                                                         اور تدبیر کاری کے اعتبار سے دو واضح منطقوں میں تقسیم ہو گیا، ایک منطقہ رومان

                        کا تھا، جہاں خواب و خیال اپنی  رنگینیاں بکھیرتے اور شیرینیاں  بانٹتے دکھائی دیتے

                                          ہیں، یہاں فرد اپنی ذہنی و جذباتی آزادی اور فطری مسرت کی حفاظت کے لئے کوشاں

               دکھائی دیتا ہے۔” (2)

                                     افسانے کے ابتدائی دور میں        پریم چند نے محروم اور پسے ہوئے طبقوں، کسانوں، محنت کشوں اور دکھوں کے مارے لوگوں  کا گہرا مشاہدہ کیا اور ان کی کہانیوں کو افسانوں کا موضوع بنایا۔پریم چند کے برعکس سجاد حیدر یلدرم نے اپنے افسانوں کی بنیاد سماجی ، اقتصادی یا قومی مسائل سے ہٹ کر تخیلی محبت پر رکھی۔ ان کے افسانوں میں رومانوی فضا ملتی ہے۔  رومانوی رجحان کرشن چندر کے ہاں بھی موجود ہے۔ افسانے کے رومانوی دور میں مجنوں گورکھ پوری، سلطان حیدر جوش، سدرشن، علی عباس حسینی، عاشق بٹالوی  بھی اہم نام ہیں۔ افسانے میں رومانیت کے حوالے سے ڈاکٹر فردوس انور قاضی رقم طراز ہیں:

                     ” رومانیت کے عمبردار ایک ایسی فضا کے متلاشی تھے جہاں صرف حسن ہو، فراغت

                                                                       ہو، غموں سے دوری ہو اور زندگی کی مشکلات مفقود و معدوم ہوں جس کی فضا میں

                                                پھول ہوں، خوشبو ہو، نرم رواں ابر کے ٹکرے، ہلکی ہلکی نرم پھوار، چاندنی اور اس

                                                                     کے درمیان محبت کی زندگی ہر غم سے بے نیاز دھیرے دھیرے دبے پاؤں چلی جائے۔

                                                                                                            جس کی راہ میں رکاوٹ، غم اور پریشانی کا ایک بھی کانٹا نہ آئے۔” (3)

             افسانے کا زریں دور

                 1930  ء سے  1955    ء تک عرصے کو ہم اردو افسانے کا زریں دور کہہ سکتے ہیں اس دور میں افسانہ  فنی اور فکری لحاظ سے اپنے عروج پر پہنچ گیا۔  اسی دور میں “انگارے” کی اشاعت ہوئی۔ 1932   ء میں چھپنے والی اس کتاب نے بھی افسانہ نگاری پر گہرے اثرات مرتب کئے۔  1936  ء میں ترقی پسند تحریک کا باقاعدہ آغاز ہوا ۔ ترقی پسند تحریک کے زیرِ اثر لکھنے والوں نے افسانے کو نئی جہتیں عطا کیں۔  اردو افسانے نے ترقی کی اور عالمی معیار کے حامل افسانے تحریر کئے گئے۔

                                                                                                  سعادت حسن منٹو اور عصمت چغتائی     1930   ء کے بعد اہم ترین افسانہ نگار ہیں۔ ان کے ہاں موضوعات کا تنوع ملتا ہے۔ انہوں نے جنسی موضوعات کو بھی افسانے کا حصہ بنایا۔

    افسانے میں حقیقت نگاری اور رومانیت کا  امتزاجی دور

                      اس کے بعد رومانیت اور حقیقت نگاری کا امتزاجی دور آتا ہے۔  اس دور میں غلام عباس، احمد ندیم   قاسمی، حسن عسکری، ممتاز مفتی، عزیز احمد، حاجرہ مسرور، خدیجہ مستور، قرۃ العین حیدر، کرشن چندر، بیدی ، راما نند ساگر، مہندر ناتھ، ممتاز شیریں   اور  بیسیوں افسانہ نگاروں نے بہترین افسانے لکھے۔

            افسانے کا جدید دور 

                              اس کے بعد جدید افسانہ نگار سامنے آتے ہیں۔ ان میں انتظار حسین، شوکت صدیقی، جیلانی بانو، واجدہ تبسم، اشفاق احمد، اے حمید، انور سجاد، جوگندر پال، مسعود مفتی، احمد داؤد، سمیع آہوجا، خالدہ حسین، رشید امجد، منشا یاد، احمد جاوید  اور مرزا حامد بیگ  کے نام نمایاں ہیں۔  اردو افسانہ جو کم وبیش تیس برس تک ترقی پسندوں کے زیرِ اثر پروان چڑھتا رہا تھا  اب جدیدیت کی طرف گامزن ہوا۔ 1955 ء کے لگ بھگ کا زمانہ ایسا تھا جب دنیا میں ہر سیاسی اور سماجی سطح  پر انتشار ہی انتشار تھا۔   عالمی تناظر میں سماجی انقلاب اور معاشی مساوات کے نظریات دم توڑ رہے تھے۔     جدید نسل کے لکھنے والوں  نے اپنی آزردگی، ذہنی انتشار اور کرب  کے باعث ترقی پسند تحریک سے دور ہوتے چلے گئے۔

                  اسلوب یا تکنیک کے اعتبار سے جدیدیت کے افسانے میں کئی خصوصیات نمایاں ہیں۔ ان میں علامت نگاری ، تجریدیت، شعور  کی رو، تمثیل، استعارے، فال بیک تکنیک وغیرہ قابلِ ذکر ہیں۔

      افسانے میں  علامت نگاری کا آغاز و ارتقا

        روایتی یا ترقی پسند تحریک کے زیر اثر لکھے جانے والے افسانوں میں باقاعدہ ایک مرکزی خیال اور پلاٹ ہوتا تھا اور اس خیال یا پلاٹ کو مرکزی کرداروں کی مدد سے آگے بڑھایا جاتا تھا اور اسے مکمل صورت دینے کے بعد منطقی انجام تک پہنچایا جاتا تھا ۔ لیکن جب جدیدیت کا دور شروع ہوا تو پلاٹ کے متعلق نظریات میں نمایاں تبدیلی ہوئی اس کی اہمیت آہستہ آہستہ ختم ہونے لگی ۔یہاں تک کہ بغیر پلاٹ کے افسانے لکھے جانے لگے۔   ڈاکٹر سلیم اختر لکھتے ہیں:

               ” علامتی اور تجریدی افسانہ گو آج کی پیداوار معلوم ہوتا ہے، لیکن اس کا آغاز اتنا

                                                                           اچانک نہیں جتنا بعض اوقات  قارئین کے ردعمل سے محسوس ہوتا ہے۔ ترقی پسند

                                              افسانہ نگاروں نے بعض ایسے افسانے بھی لکھے ہیں جو آج کے مفہوم کے لحاظ سے

                خالص علامتی اور تجریدی تو نہ تھے لیکن ان کے روپ میں حقیقت پسندانہ  افسانہ

                             علامت اور تجریدیت کی طرف مائل پرواز نظر آتا ہے یوں وہ حقیقت اور علامت

                            اور واقعیت اور تجریدیت کے درمیان “نو مینز لینڈ” ایسی صورت اختیار کر لیتے

                           ہیں۔ کرشن چندر کا “دو فرلانگ لمبی سڑک” جو بغیر پلاٹ کا ایک کامیاب افسانہ

                               سمجھا جاتا ہے   اور میرزا ادیب کا “درونِ تیرگی” بلا شبہ علامتی افسانہ کی اولین صورت

                            قرار دیا جا سکتا ہے۔” (4)

                                                                                                                                                                                                             افسانہ جو حقیقت نگاری سے شروع ہوا تھا  اب علامتی اور تجریدی رخ اختیا ر کرنے لگا۔ علامتی اور تجریدی افسانے کو ترقی پسند افسانوں کا ردِ عمل بھی سمجھا جا سکتا ہے۔  علامتی افسانوں پر بات کرنے سے پہلے یہ جائزہ لینا چاہیے کہ علامت  کے حوالے سے      فوزیہ اسلم  کہتی ہیں:

               ”  علامت ادیب اور شاعر کے لئے اظہار کا ایک قرینہ اور قاری کے لئے ادراک

                              کا ایک وسیلہ ہے۔ اگرچہ  ادب کی طرح علامت کے بھی کوئی حتمی یا اکہرے معنی

                                             تا حال متعین نہیں ہو سکے۔ تاہم دنیا بھر کے ادب میں اس کے وضعی اور غیر وضعی

                                معانی میں فرق رہا ہے اور اب بھی ہے۔ لیکن اس کے باوجود اس اصطلاح کے ذہن

                            میں آتے ہی ایک معنی بہر حال متعین ہو جاتے ہیں۔ ہمارے ہاں علامت  انگریزی

                            سمبل کے متردف کے طور پر استعمال ہوتا ہے۔” (5)

                   ترقی پسند افسانے میں  انسان اور انسان دوستی کا نعرہ بلند کیا گیا تھا لیکن جدید افسانے نے اس نعرے کو کوئی اہمیت نہیں دی۔  اگرچہ موضوعات تو انسان کے گرد ہی گھومتے ہیں لیکن مجموعی طور پر افسانے کا کینوس وسیع ہوا۔ بقول ڈاکٹڑ سلیم اختر:

                       ” علامتی افسانہ اور تجریدی افسانہ بالکل جداگانہ ہیں اور ہر دو کے تکنیکی تقاضے

                            الگ الگ ہیں۔ لیکن بالعموم دونوں کو ایک ہی سانس میں ایک دوسرے کے

                                                        مترادف قرار دے دیا جاتا ہے۔ علامتی افسانہ کی اساس بالعموم کسی تلمیح

                                   داستاں یا مذہبی قصہ پر ہوتی ہے۔ کبھی اس میں متھ سے کام لیا جاتا ہے تو کبھی

                                                                                                                     بچوں کی کہانیوں سے لیکن یہ سب کچھ بیان کیا جاتا ہے کہ ماضی کے تناظر میں

                                                           حالیہ وقوعہ رنگ افروز نظر آتا ہے۔ یہ علامتی افسانہ کی اساسی صفت ہے

                                                                                                    ماضی پرستی نہیں اور نہ کہنہ روایات کو زندہ کرنا بلکہ ماضی کی روشنی سے حال

                                                        کی تاریکی اجاگر کی جاتی ہے۔ ”   (6)

             اردو افسانے  میں علامت نگاری کا آغاز 1955 کے بعد باقاعدہ طور پر ہوتا ہے۔ اس دور میں جدید افسانہ نگاروں کی ایک کھیپ منظرِ عام آتی ہے۔ یہ دور عالمی ترقی کے دور کا بھی آغاز تھا۔ دنیا کے حالات بدل رہے تھے۔ سائنس برق رفتاری سے ترقی کر رہی تھی۔ نئی نئی ایجادات ہو رہی تھیں۔ انہی حالات میں افسانے نے بھی نئی کروٹ لی۔ اس حوالے سے  ڈاکٹر سلیم آغا قزلباش  کہتے ہیں:

                      ”  مختلف آرا کی روشنی میں یہ واضح ہو چکا ہے کہ جدید علامتی افسانے کا آغاز سن پچاس

                                                                                 کی دہائی کے آخری چند سال میں ہوا۔ تاہم 1955    ء  سے 1970  ء  تک کا عرصہ دنیائے

                                          علم و ادب، سائنس اور ٹیکنالوجی کے اعتبار سے بڑا ہنگامہ خیز تھا۔ الیکٹرونکس کے

                                                                                       میدان میں  نئی نئی ایجادات سامنے آ رہی تھیں۔ کمپیوٹر ٹیکنالوجی کی طرف پیش رفت

                                              شروع ہو گئی تھی۔ سپوتنک کی صورت خلائی مہمات کا آغاز ہو چکا تھا جو 1969  ء  میں

                       چاند کی تسخیر پر منتج ہوا۔ گویا خلا میں قدم رکھنے سے آدمی پہلی مرتبہ ریشم کے کیڑے

                                                          کی طرح زمین کے “خول” کو توڑ کر باہر آیا یعنی ایک طرح سے اس کے پر نکل آئے

                                                                            اور وہ ایک نئے تجربے سے دوچار ہوا۔ اس نئے اور انوکھے تجربے نے انسان کی آنکھیں

                                                   مزید روشن کر دیں اور اس کے یہاں نئی نئی دنیاؤں کو تسخیر کرنے کے جذبے کے ساتھ

                          ساتھ کائناتی شعور بھی پروان چڑھنے لگا۔”(7)

               انتظار   حسین علامتی  افسانے ایک بڑا نام ہیں۔ انتظار حسین کے “آخری آدمی” کے افسانوں میں انسانی زندگی ایک” میں ” میں سمٹ آئی ہے۔ وہ “میں” تنہائی میں قید ہے۔ اسے کچھ علم نہیں کہ باہر بھی ایک دنیا ہے جہاں جیتے جاگتے لوگ ہیں۔ انتظار حسین کو وہ لوگ نظر نہیں آتے۔ “آخری آدمی ” کے افسانوں کے تقریباً تمام کردار آنکھ مچولی کھیلتے نظر آتے ہیں۔ قاری انہیں افسانے میں ڈھونڈتا رہتا ہے۔ ڈاکٹر فردوس قاضی اس حوالے سے لکھتی ہیں:

                   ” آج کل کی مصروف اور الجھی ہوئی زندگی میں آنکھ مچولی کے اس کھیل میں شریک

                      ہونے کا وقت کس کے پاس ہے۔ افسانے لوگ اس لئے نہیں پڑھتے کہ وہ افسانوں

                       کی بجائے پہیلیاں بوجھیں۔ افسانے میں علامتی یا رمزیہ انداز اس حد تک تو قابلِ قبول

                                                                          ہو سکتا ہے کہ وہ سماجی حقیقتوں کو زیادہ موثر، زیادہ فکر انگیز، زیادہ تیکھا، زیادہ  دلچسپ

                                                                 بنا کر پیش کر سکے۔ لیکن سلجھی ہوئی باتیں بھی الجھ جائیں اس حد تک علامتی انداز

                                                       ناقابلِ قبول اور بے جواز بن جاتا ہے۔” (8)

                                                   علامتی افسانہ پہیلی کی طرح ہے یا قارئین کی کثیر تعداد کے لئے ابلاغ کا مسئلہ ہے  اس کے باوجود علامتی افسانے کا سفر جاری رہا۔ انتظار حسین کے علاوہ بیسیوں افسانہ نگار علامتی افسانہ نگاری کی طرف مائل ہوئے۔ اس بارے میں   ڈاکٹر سلیم آغا قزلباش  کہتے ہیں:

                  ”  علامتی افسانہ کے فروغ پانے کی ایک نفسیاتی وجہ یہ تھی کہ ساٹھ کی دہائی کا افسانہ نگار

                     غیر شعوری اور کسی حد تک شعوری طور پر یہ محسوس کرنے لگا تھا کہ منٹو ، بیدی، کرشن

                                                                                            چندر،  عصمت اور غلام عباس کی روایت کی پاسداری میں اپنی پہچان یا شناخت قائم نہیں

                                                                     رکھ سکتا یا یوں کہہ لیجیے کہ وہ پلاٹ، کردار اور ماحول کی تثلیث میں مقید افسانے سے

                                         خوف زدہ اور کسی حد تک بد ظن ہو گیا تھا۔ لہٰذا اس نے روایت سے بغاوت کی اور مغربی

                                         افسانے کا تتبع کیا۔ اس ضمن میں کافکا، سارتر، کامیو، طامس مان، ہرمن، آئیو نسکو، جارج

                                                                                                    آرویل، ولیم فاکنز اور سیموئیل بیکٹ وغیرہ کی تحریروں سے متاثر ہو کراس نے اردو افسانے

                                                               میں اظہار کے اس نئے سلسلے کی نیو  ڈالی۔”  (9)

            علامتی  افسانہ کافی مقبول ہوا۔ نیا پن بھی اس کا ایک سبب ہے کہ انسانی طبیعت تبدیلی چاہتی ہے اور چوں کہ یہ نیا انداز تھا اس لئے بھی  یہ مقبولیت پانے لگا۔  بقول ڈاکٹر سلیم آغا قزلباش:

                                       ”  روایتی افسانہ کے بر عکس علامتی افسانے  میں فنی اور تکنیکی حوالے سے کچھ ایسی

                                                                                  سہولیات بھی موجود تھیں کہ جن کے باعث علامتی افسانے کو کافی مقبولیت حاصل

                                 ہوئی ۔ علامتی افسانے کی ایک اہم دین ، اسلوب کی تازہ کاری ہے۔ اس نے اسلوب

                                                             کو  اکہرے پن اور سطحیت سے نجات دلائی، اس میں ذاتی تلازمے، رمزیے، علامیے

                                                                       اور اشاریے شامل کئے، جملوں کی روایتی ساخت کو توڑا اور اسے بنی بنائی کھائیوں سے

                                           نکال کر اس میں عمودی گہرائی پیدا کی۔ ”    (10)

                  علامت نگاری کا فن محنت طلب اور مشکل ہے۔ اس کے لئے خاصی ریاضت، ذہانت اور مہارت کی ضرورت ہوتی ہے۔ افسانہ نگار اول تو خود حقائق سے اچھی طرح آگاہ ہو اور پھر ماضی کے مواد کو فنکارانہ مہارت سے علامتی رنگ میں پیش کرے کیوں کہ علامت کی بنیا عام طور پر کسی قدیم داستان، مذہبی قصہ یا واقعہ اور اساطیر یا حکایت پر ہوتی ہے۔ علامتی افسانہ مبہم اور واضح علامتوں سے ماضی اور حال کو جوڑنے کا کام کرتا ہے۔ علامتی افسانے  کو سمجھنے کے لئے قاری کو بھی اپنی ذہنی سطح کو بلند کرنا پڑتا ہے تاکہ وہ   ان علامتوں اور اشارات کو اسی تناظر میں سمجھ سکے جس میں افسانہ نگار نے انہیں بیان کیا ہے۔

                         علامتی افسانہ نگاری میں انتظار حسین کو پیش رو کی حیثیت حاصل ہے۔ ان کے بعد   ڈاکٹر انور سجاد اور ڈاکٹر رشید امجد بہت اہم  نام ہیں۔  ان کے ساتھ ساتھ  جوگندر پال، بلراج مینرا ، مسعود اشعر، رام لعل ، سریندر پرکاش وغیرہ کا نام لیا جا سکتا ہے۔

                       ڈاکٹر مرزا حامد بیگ، ڈاکٹر اعجاز راہی، ساجد ہدایت، فیصل سعید ضرغام، عطا الرحمان خاکی، احمد جاوید،  مظہر الاسلام اور ابدال بیلا  بھی جدید ترین افسانہ نگاروں میں شامل ہیں جو علامت نگاری  سے کام لیتے ہیں۔

       اردو افسانے میں علامت نگاری کے رجحان نے  افسانے کے دامن کو وسیع کیا۔ افسانہ نگاروں نے بہترین افسانے تخلیق کئے لیکن اس کا ایک نقصان بھی ہوا کہ افسانہ آج کے قاری سے محروم ہوتا جا رہا ہے۔ کیوں کہ آج کی نوجوان نسل مطالعے سے زیادہ کمپیوٹر اور انٹر نیٹ پر انحصار کرتی ہے۔ آج کے نوجوان اپنی محدود معلومات کے ساتھ افسانے کی علامتوں کو سمجھنے میں دقت محسوس کرتے ہیں۔ اس کے ساتھ ساتھ وہ پہیلیاں بوجھنے میں دلچسپی نہیں رکھتے۔ جب کہ آج کا علامتی افسانہ تو اچھا خاصا معما بن چکا ہے جسے عام قاری تو کیا کسی دوسرے افسانہ نگار کے لئے بھی سمجھنا مشکل ہے۔ آج کی نسل کے پاس

 اتنا وقت نہیں کہ وہ علامتوں کی بھول بھلیوں میں اصل کہانی ڈھونڈتا رہے۔ چناں چہ آج کے افسانہ نگار اگر مبہم اور غیر واضح علامتوں کی بجائے واضح علامتیں استعمال کریں تو بہتر ابلاغ ہو سکتا ہے۔

            حوالہ جات

1۔ ڈاکٹر فردوس انور قاضی، اردو افسانہ نگاری کے رجحانات، مکتبہ عالیہ، لاہو، 1999، ص 42

2۔  ڈاکٹر انوار احمد،  اردو افسانہ ایک صدی کا قصہ،    مقتدرہ قومی زبان،  سن ندارد، ص 22

3۔    ڈاکٹر فردوس انور قاضی، اردو افسانہ نگاری کے رجحانات، مکتبہ عالیہ، لاہو، 1990، ص  66

4۔  ڈاکٹر سلیم اختر، افسانہ حقیقت سے علامت تک مشمولہ علامت نگاری،      مرتبہ اشتیاق احمد، بیت الحکمت، لاہور، 2005 ء  ،     ص  178

5۔       فوزیہ اسلم، اردو افسانے میں اسلوب اور تکنیک کے تجربات(مقالہ پی ایچ ڈی)، نمل یونیورسٹی، اسلام آباد، اکتوبر 2005،  ص 439۔

6۔      ڈاکٹر سلیم اختر، افسانہ حقیقت سے علامت تک مشمولہ علامت نگاری،      مرتبہ اشتیاق احمد، بیت الحکمت، لاہور، 2005    ء   ،  ص 179

7۔     ڈاکٹر سلیم آ غا        قزلباش  ، جدید اردو افسانے کے رجحانات، احمد برادرز، کراچی، 2000 ء، ص 354

 8۔ ڈاکٹر فردوس انور قاضی،   اردو افسانہ نگاری کے رجحانات،   مکتبہ عالیہ، لاہور ،  1990ء، ص   497

9۔ ڈاکٹر سلیم آ غا        قزلباش  ، جدید اردو افسانے کے رجحانات، احمد برادرز، کراچی، 2000    ء، ص 357

10 ۔     ڈاکٹر سلیم آ غا        قزلباش  ، جدید اردو افسانے کے رجحانات، احمد برادرز، کراچی، 2000   ء، ص 358