افسانے کےآغاز حوالے سے محققین کا اتفاق ہے کہ افسانہ بیسویں صدی کے ساتھ ہی شروع ہوتا ہے ۔ برصغیر کے سماج میں زندگی کے ہر شعبے میں مردوں کی اجارہ داری دکھائی دیتی ہے۔ شاید یہی وجہ ہے کہ افسانے کے آغاز کے بعد افسانہ نگاری میں پریم چند، سجاد حیدر یلدرم، نیاز فتحپوری، سلطان حیدر جوش، مجنوں گورکھپوری، سدرشن، علی عباس حسینی، حامد اللہ افسر، عاشق بٹالوی، میرزا ادیب، ایم اسلم، غلام عباس، ممتاز مفتی، احمد ندیم قاسمی، سعادت حسن منٹو اور بیسیوں نام نظر آتے ہیں لیکن خواتین افسانہ نگار خال خال ہی نظر آتی ہیں۔ اس کے باوجود ابتدائی دور سے ہی خواتین نے افسانے کے میدان میں بھی قدم رکھا اور اپنے قلم سے شاہکار افسانے لکھ کر افسانے کی روایت میں قابلِ قدر کردار ادا کیا۔ مرزا حامد بیگ اس حوالے سے کہتے ہیں:
” ہمارے ہاں عورت کو زندگی کرنے کے مساویانہ حقوق نہ ملنے کے سبب جملہ تہذیبی
نشو و نما اور سماجی سرگرمیوں کے ساتھ ساتھ ادبی سطح پر بھی عورت کا تخلیقی اشتراک
اس طور پر میسر نہ آ سکا جیسا کہ مغرب میں دکھائی دیتا ہے اس کے باوجود شعری سطح
زیب النسا مخفی (بنتِ اورنگ زیب عالمگیر) سے پروین شاکر اور افسانوی سطح پر رشیدۃ
النسا بیگم ( مصنفہ قصہ اصلاح النسا) سے قرۃ العین حیدر تک نسوانی تخلیقی اظہار نے تہذیبی،
سماجی اور ادبی سطح پر بھرپور اثرات مرتب کئے۔ (1)
خواتین نے جب ادب کے میدان میں قدم رکھا تو یہ ان کے لیے بہت دلیری کی بات تھی کیوں کہ خواتین سے یہ توقع نہیں کی جاتی تھی کہ وہ افسانے یا کہانیاں لکھیں۔ اسی لیے شروع میں ایسی خواتین
لکھاری بھی تھیں جو فرضی ناموں سے لکھتی تھیں۔ اگر کوئی خاتون اپنے نام سے عمدہ تحریر لکھتی تو کہا جاتا کہ یہ اس نے نہیں لکھا ہو گا ، اس کے بھائی یا باپ نے لکھ کر دیا ہو گا۔ بقول قرۃ العین حیدر:
” ان میں یہ جسارت آ گئی کہ وہ یہ بتا سکیں کہ زندگی کے بارے میں ان کی رائے
کیا ہے۔ ہمارے یہاں عورتوں کی اس پیش رفت کو بھی بڑے شک و شبہ یا استہزا
کی نظر سے دیکھا گیا۔ شروع شروع میں ایک عرصہ تک یہ کہا گیا کہ ارے صاحب
فلاں فلاں خود تھوڑے ہی لکھتی ہیں ان کے والد یا شوہر یا بھائی ان کو لکھ کر دیتے
ہیں ۔” (2)
خواتین افسانہ نگاروں نے اگرچہ افسانہ نگاری کے میدان میں دیر سے قدم رکھا لیکن اب فہرست مرتب کی جائے تو خواتین افسانہ نگاروں کی ایک بڑی تعداد موجود ہے۔ جن میں حجاب امتیاز علی، نذر سجاد حیدر، رشید جہاں، عصمت چغتائی، قرۃ العین حیدر، رضیہ سجاد ظہیر، جمیلہ ہاشمی، صدیقہ بیگم، تسنیم سلیم چھتاری، بانو قدسیہ، واجدہ تبسم، ممتاز شیریں، جیلانی بانو، آمنہ ابوالحسن، رفیعہ منظور الامین، شکیلہ اختر، خدیجہ مستور، بشریٰ رحمٰن، ہاجرہ مسرور، نیلم احمد بشیر، عذرا اصغر، نیلوفر اقبال، سلمیٰ اعوان، شبنم شکیل، سیما پیروز، رئیس فاطمہ ، فرخندہ شمیم ، صائمہ نورین بخاری، زینت ساجدہ، قمر جمالی، صغریٰ مہدی، ترنم ریاض، غزال ضیغم، خالدہ حسین، ذکیہ مشہدی، صادقہ نواب سحر، نگار عظیم وغیرہ شامل ہیں۔ ذیل میں اردو افسانے کی روایت میں چند اہم افسانہ نگار خواتین کے کردار کا جائزہ لیا جائے گا۔ حجاب امتیاز علی
حجاب امتیاز علی ابتدائی خواتین افسانہ نگاروں میں سے ہیں۔ اس زمانے میں مسلم گھرانوں کی لڑکیوں پر سخت پابندیاں عائد تھیں۔ حجاب امتیاز علی ایک تعلیم یافتہ خاندان سے تعلق رکھتی تھیں اس
لئے انہیں اعلیٰ تعلیم حاصل کرنے کا موقع ملا۔ حجاب امتیاز علی نے رومانی افسانے لکھے۔ حجاب کے افسانے زبان و بیان اور فنی لحاظ سے بلند ہیں۔ ان کے افسانوں کا پلاٹ اکہرا، مربوط اور مضبوط ہوتا ہے۔ ان کے افسانوی مجموعے میری نا تمام محبت، ممی خانہ، تحفے اور شگوفے قابلِ ذکر ہیں۔
حجاب امتیاز علی کے کردار رومانی ہونے کے باوجود اخلاقی اور تہذیبی روایات کی پاسداری کرتے دکھائی دیتے ہیں۔ وہ محبت کا جذبہ اتنی نفاست سے پیش کرتی ہیں کہ یہ کردار دل میں اتر جاتے ہیں۔
حجاب امتیاز علی کے افسانے “تحفے” کا ایک اقتباس ملاحظہ کیجیے:
” جاتی کہاں ہوں؟ میں نے غضب ناک آواز میں کہا۔
دادا ابا کے پاس۔ ان سے تمام حالات کہہ کر تم دونوں کی وہ گت بنواؤں گی
کہ یاد کیا ۔۔۔”
ریحانی میرے آگے دا زانو ہو گیا۔” میری شیریں! میری راحت! میری
روحی۔ ایسا نہ کرنا۔ دیکھو میں مچھلی کی شکل کی شیشی لا دوں گا۔ تم بڑی پیاری
لڑکی ہو۔ جو کچھ میں نے اس وقت کیا محض مذاق میں کیا۔ دیکھو روحی زندگی
کا لطف ایسی ہی باتوں سے تو ہے۔ مذاق آپس میں کرتے ہی ہیں۔ تم ناحق
وحشت زدہ ہو گئیں۔” (3)
عصمت چغتائی
عصمت چغتائی کے افسانوں کا رجحان معاشرتی ناانصافیوں، فرد کی نفسیاتی الجھنوں اور جنسی تحریکات کی بے راہ روی پر مشتمل ہے۔ عصمت چغتائی نے ایک ایسے عہد میں جہاں عورت کو جنس کا نام
لینے کی بھی اجازت نہیں تھی عورتوں کے بعض جنسی مسائل کو موضوع بنایا۔ ان کے ہاں جنس ایک فطری عمل ہونے کے ساتھ ساتھ زندگی کا دلچسپ اور کہیں مضحکہ خیز کھیل بن جاتا ہے۔ “لحاف” ان کا ایک ایسا ہی افسانہ ہے ۔ عصمت چغتائی حقیقت نگاری بھی کرتی ہیں۔ انسانوں سے محبت اور زندگی سے محبت ان کے افسانوں میں دکھائی دیتی ہے۔ جہاں تک زبان و بیان کا تعلق ہے عصمت کے ہاں تیزی، تیکھا پن، جملوں میں گہری کاٹ، دلچسپ تشبیہ اور استعاروں کی کثرت ملتی ہے۔ عصمت چغتائی کے افسانے “لحاف ” سے اقتباس ملاحظہ کیجے:
” لحاف پھر امنڈنا شروع ہوا۔ میں نے بہتیرا چاہا کہ چپکی پڑی رہوں ۔ مگر اس
لحاف نے تو ایسی عجیب عجیب شکلیں بنانی شروع کیں کہ میں ڈر گئی۔ معلوم ہوتا
تھا غوں غوں کر کے کوئی بڑا مینڈک پھول رہا ہے اور اب اچھل کر میرے
اوپر آیا۔
آ ۔۔۔ن ۔۔۔اماں ۔۔۔ میں ہمت کر کے گنگنائی۔مگر وہاں کچھ شنوائی نہ ہوئی
اور مینڈک میرے لحاف اور دماغ میں گھس کر پھولنا شروع ہوا۔” (4)
عصمت چغتائی کی تصانیف میں چوٹیں، لحاف، کلیاں، کاغذی ہے پیرہن، ٹیڑھی لکیر، معصومہ، فسادی، ضدی، سور ممی، سودائی اور دو ہاتھ شامل ہیں۔
خدیجہ مستور
خدیجہ مستور کے ابتدائی دور کے افسانوں پر عصمت چغتائی کے اثرات دکھائی دیتے ہیں مگر رفتہ رفتہ وہ ان اثرات سے آزاد ہو گئیں اور انہوں نے اپنا منفرد انداز اپنا لیا۔ بطور افسانہ نگار خدیجہ مستور نے اردو افسانے کو زبان و بیان اور موضوع کے لحاظ سے نئے امکانات اور وسعتوں سے روشناس کروایا۔
خدیجہ مستور کا تعلق انجمن ترقی پسند تحریک سے بھی تھا۔ وہ ترقی پسند افسانہ نگاروں میں نمایاں مقام رکھتی ہیں۔ ان کے افسانوں میں طبقاتی اونچ نیچ، ناداری ، بھوک اور پردے کی مخالفت اور مولویانہ ریا کاری پر براہِ راست چوٹ اہم موضوعات ہیں۔
خدیجہ مستور حقیقی زندگی سے موضوعات چنتی ہیں۔ ان کے افسانوں میں نچلے طبقے کے دکھ جا بجا بکھرے نظر آتے ہیں۔ تقسیم ہند اور فسادات بھی خدیجہ مستور کا موضوع ہیں۔ فسادات لے موضوع پر بہت سے افسانے لکھے گئے ہیں۔ اکثر افسانہ نگاروں نے ہندوؤں اور سکھوں کے مظالم کی تصویر کشی کی ہے لیکن خدیجہ مستور نے مسلمانوں کی طرف سے جوابی طور پر پرتشدد کاروائیوں کا حال لکھ کر تصویر کا دوسرا رخ بھی دکھایا ہے۔
خدیجہ مستور انسانی نفسیات اور عورت کی جنسی ناآسودگی کے موضوع پر بھی قلم اٹھاتی ہیں۔ خواتین کی حیثیت، نفسیات اور مسائل ان کے پسندیدہ موضوعات ہیں۔ کھیل، بوچھاڑ، تھکے ہارے، چند روز اور ٹھنڈا میٹھا پانی ان کے افسانوی مجموعے ہیں۔ “ٹھنڈا میٹھا پانی” کے ایک افسانے “سودا” کا اقتباس دیکھیے:
“سر جھکائے جوتوں پر نظریں گاڑے گاڑے جب کافی دیر ہو گئی تو آیا اسے
اپنے ساتھ بیگم کے کمرے میں لے گئی۔ سرخی پاؤڈر سے لپی پُتی گڑیا جیسی
بیگم کو اپنے بستر میں موم کے گدے میں غوطے لگاتے دیکھ کر وہ تھر تھر کانپنے
لگا۔ بھلا اس کا کیا قصور تھا۔ اسےتو آیا لے آئی تھی۔ اس نے پہلے ہی دیکھ لیا ہوتا
کہ کہیں بیگم لیٹی تو نہیں۔
” تم کو کون سا کام کرنا آتا ہے؟” بیگم نے بڑےرعب سے سوال کیا اور
ٹانگیں پھیلا کر چت لیٹ گئیں۔
” جو کہیں بی بی جی۔” اس نے ڈرتے ڈرتے بیگم کی طرف دیکھ کر نظریں
جھکا لیں۔ اس طرح تو کبھی اس کے سامنے رانی بھی نہ لیٹی تھی۔ اگر یوں لیٹی
(جاری ہے)ہوتی تو۔ تو۔ وہ گڑبڑا گیا۔” (5)
